Ndërmjet kardinajve të rinj është edhe jezuiti francez Atë Albert Vanhoi, ish-rektor
i Institutit Papnor Biblik dhe ish-sekretar i Komisionit Papnor Biblik - nënvizon
ç’do të thotë të bëhesh kardinal
(23. 03. 06 R. V.) Me këtë Koncistor, numri i kardinajve arrin në 193, nga të cilët
120 me të drejtë zgjedhore: prej tyre, 100 kardinaj janë evropianë, 32 latinoamerikanë,
20 veriamerikanë, 20 aziatikë, 17 afrikanë e 4 nga Oqeania. Ndërmjet tyre edhe jezuiti
francez Atë Albert Vanhoi, 82 vjeç, ish-rektor i Institutit Papnor Biblik dhe
ish-sekretar i Komisionit Biblik. E pyetëm ç’do të thotë të bëhesh kardinal? *** -
Për mua, të bëhesh kardinal do të thotë mbi të gjitha të jesh i lidhur me Atin e Shenjtë
në një mënyrë të veçantë. Kjo është diçka shumë impenjative, sepse duhet të mbart,
me Atin e Shenjtë, shqetësimet e perspektivat e jetës së Kishës. *** - Ngjyra
e veshjeve kardinalore është e kuqja... *** - E kuqja është ngjyra e dashurisë,
e zjarrit, është dhe ngjyra e Mundimeve të Krishtit. Thuhet se kardinajtë duhet të
jenë gati edhe për të derdhur gjakun e tyre – e e kuqja është pikërisht ngjyra e gjakut.
E kjo do të thotë t’i kushtohen plotësisht Mbretërisë së Krishtit. *** -
Kaloi gati një vit nga zgjedhja e Benediktit XVI. Ç’po i sjell Kishës Papa i ri? *** -
Ati i Shenjtë e filloi ministerin e tij me një impenjim shumë të thellë e, me Enciklikën
e tij të parë, tregoi orientimin e tij kryesor, dmth të pohojë se Zoti është dashuri
jo vetëm me ndjenja, por edhe me vepra konkrete që i përgjigjen nevojave të botës.
Kjo Enciklikë më është dukur shumë domethënëse, ashtu si më është dukur se përkon
më së miri me karakterin e Papës, i cili ka një temperament shumë të përzemërt, plot
ndjeshmëri, delikatesë e fisnikëri. Prandaj nuk më çuditi zgjedhja e temës së Enciklikës
së parë që, nga ana tjetër, vë me të vërtetë gishtin mbi gjënë më themelore të gjithë
fesë sonë: ‘Zoti është dashuri’. *** - Ju jeni biblist me famë ndërkombëtare.
Benedikti XVI i ka ftuar disa herë besimtarët për Lectio divina.... *** -
Lectio divina është një formë vërtetë e frytshme e meditimit dhe e lutjes.
Nganjëherë lutja e krishterë rrezikon të jetë tepër larg Fjalës së Zotit. Ndërsa mund
të themi se kur njeriu dëshiron të lutet, gjëja e parë që duhet të bëjë është të dëgjojë
Fjalën e Zotit, sepse lutja mbi të gjitha është dialog me Zotin. Prandaj Lectio
divina kërkon në radhë të parë të ndiqet me vëmendje të plotë teksti i Shkrimit
Shenjt, që është Fjala e Zotit, pastaj të meditohet për të arritur në bashkim të thellë
me Zotin në dritën e dashurisë së tij. *** - Si mund ta dëgjojmë sot Fjalën
e Zotit mes zhurmave shurdhuese të jetës së përditshme? *** Është e qartë
se duhet një përpjekje për t’u përqendruar në lutje. Njeriu nuk mund të rritet normalisht,
në se nuk i lë vetes sadopak kohë për të menduar, për të reflektuar, për të medituar,
përndryshe e merr me vete potera e përditshme që e bën njeriun të humbasë jetën shpirtërore,
dmth i krijon zbrazësi, ia tjetërson natyrën e tij njerëzore, duke e kthyer në një
send që shkon nga të fryjë era. Prandaj për jetën shpirtërore është absolutisht e
nevojshme të distancohesh, jo për t’u shkëputur nga bota, por për të pasur një lidhje
edhe më të fuqishme me botën.