Dje në lutjen e Engjëllit të Tënzot Papa foli për Shën Jozefin. Një mendim edhe për
500-vjetorin e Muzeve të Vatikanit
(20. 03. 06 R.V.)Dje,
në lutjen e Engjëllit Tënzot të solemnitetit të Shën Jozefit, Benedikti XVI vuri në
qëndër të vëmendjes figurën e Shenjtit, Pajtorit të Punëtorëve. Benedikti XVI
i ftoi besimtarët të ndalen me nderim para figurës të shokut të jetës të Virgjërës
Mari e Pajtorit të Kishës universale. Më pas kujtoi se Shenjti ka një rëndësi themelore
në historinë e shëlbimit dhe shpjegoi se nga shembulli i Shën Jozefit buron një ftesë
e fuqishme për ta kryer me besnikëri, thjeshtësi e modesti detyrën që na ka caktuar
Provania hyjnore. Mendoj para së gjithash – theksoi Ati i Shenjtë - për baballarët
e nënat e familjeve e lutem që ta vlerësojnë bukurinë e një jete të thjeshtë e punëdashëse,
duke kultivuar me kujdes marrëdhëniet bashkëshortore e duke kryer me entuziazëm misionin
e madh e të vështirë edukativ. Në përshëndetjet pas lutjes mariane, Ati i Shenjtë
kujtoi 500-vjetorin e Muzeve të Vatikanit, institucion – theksoi Benedikti XVI – që
jep një kontribut të rëndësishëm në misionin e Kishës: *** “Përkujtohet
këtë vit 500-vjetori i Muzeve të Vatikanit, që Paraardhësi im i dashur i ka quajtur
“një nga portat më të rëndësishme të Selisë së Shenjtë të hapura për botën”. *** Ndërmjet
përshëndetjeve në gjuhë të ndryshme, Papa iu drejtua në mënyrë të veçantë pjesëmarrësve
në kursin e Doktrinës Shoqërore të Kishës, organizuar nga Fondacioni Centesimus Annus
Pro Pontefice, si dhe koristëve e fizarmonicistëve të kantonit Tiçino e grupeve të
tjera ardhur dje në Vatikan për t’i uruar Papës ditën e emrit, nga krahina të ndryshme
të Italisë e nga vende të ndryshme të botës.