(19. 03. 06 R.V.) Sot, e Diela III e Kreshmëve, Kisha katolike përkujtoi edhe Shën
Gjonin abat. Nesër, e hënë, do të kremtojë solemnitetin e Shën Jozefit, fatit
të Virgjërës Mari, Pajtor i Kishës universale. Pasardhës i Jakobit, Jozefi bëhet fati
i Virgjërës Mari nga e cila, për virtyt të Shpirtit Shenjt, lindi Jezu Krishti, Zoti
ynë. Solemniteti na kujton se Hyji është besnik në të gjitha premtimet e tija. Në
të njëjtën ditë do të përkujtohet edhe Shën Gjon Nepomuçeni, meshtar e martir. *** Të
martën do të përkujtohet Shën Nëkolli i Fyjesë, pajtor i Zvicrës. Liturgjia e festës
së tij na kujton dy nga shtigjet më të mira nëpër të cilat duhet të ecin ata që duan
të arrijnë në qiell: ta falësh me gjithë zemër vëllaun që ka gabuar dhe të kesh durim
e dhembshuri për njerëzit që kalojnë çaste të vështira. *** Të mërkurën e
ardhshme do të përkujtohen Shën Lea, vejushë romake dhe Shën Pali, ipeshkëv i Narbonës
të cilët na kujtojnë se Ligji e Profetët janë udha që Ati qiellor ka përzgjedhur për
të na e dorëzuar Birin e vet, atë që e përmbush zbulesën. *** Të enjten do
të kremtohet Shën Turibi i Mogrovejos, ipeshkëv i Limës. Na kujton se për të mos i
humbur më kot forcat e mbretërisë së Hyjit, duke i lënë në duart e shejtanit, duhet
të jemi gjithnjë në bashkim me Krishtin. *** Të premten e ardhshme Kisha
katolike do të kremtojë Shën Katerinën e Suedisë, virgjër, bija e Shën Brigjidës.
Liturgjia e festës së Shenjtores suedeze na kujton se fjalët e jetës së amshuar mund
t’i dëgjojmë vetëm nga Zoti Jezus. *** Të shtunën e ardhshme do të kremtohet
solemniteti i Lajmërimit të Zotit e, me të, edhe Shën Hajduti i Mirë, Shën Kuirini
Martir, Shën Luçia Filippini, virgjër, themeluese e Mësueseve Pie Filipini, që shërbejnë
prej vitesh edhe në Shqipëri e sidomos në Berat. Jeta e tyre, dhuruar Zotit na kujton
lajtmotivin e shenjtërisë: “Jam gati, o Zot, u bëftë mbi mua vullneti yt!”