Nuk ka kundërvënie ndërmjet Krishtit dhe Kishës: kështu u shpreh Papa në audiencën
e përgjithshme
(15.03.06. R.V.) Papa Benedikti XVI nisi sot një cikël të ri katekizmi kushtuar
raportit mes Krishtit e Kishës dhe ripohoi natyrën hyjnore të mandatit misionar që
iu besua Apostujve. “Apostujt janë shenjë e bashkimit dhe e vazhdimësisë ndërmjet
zbulesës, që solli Krishti dhe përhapjes së saj në tokë, të cilën Kisha e çon përpara
që prej dymijë vjetësh”. Pasi përfundoi ciklin e katekizmit të së mërkurës kushtuar
Liturgjisë së Orëve, Benedikti XVI filloi, në audiencën që mbajti sot paradite, një
cikël të ri reflektimesh “mbi misterin e lidhjes së Krishtit e Kishës”. E menjëherë
përgenjeshtroi tezën e njëfarë teologjie mbi individualizmin e kumtimit ungjillor
si dhe disa bindje ngulmuese, që do të dëshironin ta shikonin institucionin e Kishës
në kundërshtim me figurën e Jezusit. Një parrullë që ka dalë mode, e, mbi të gjitha,
pa kurrfarë themeli. Benedikti XVI zbërtheu, që me të parin nga katekizmat e tij kushtuar
lidhjes ndërmjet Krishtit dhe korpit të tij kishtar, bindjen e një farë mendësie që
ngul këmbë për ta shikuar Krishtin në kundërshtim me Kishën e tij, duke nisur nga
ata që i shërbejnë: ipeshkvijtë e meshtarët. Kundërvënie kjo që nuk ekziston, pohoi
Papa, duke përfunduar audiencën e përgjithshme, mes duartrokitjeve të tridhjetë mijë
besimtarëve të pranishëm në Sheshin e Shën Pjetrit. Dymbëdhjetë Apostujt – tha Papa
- janë shenja më e dukshme e vullnetit të Jezusit për ekzistencën dhe misionin e Kishës
së tij; janë edhe garancia që na bind se ndërmjet Krishtit dhe Kishës së tij nuk ka
kurrfarë kundërvënieje: “Është plotësisht e papajtueshme me qëllimin e Krishtit
parulla që ishte në modë pak vjet më parë: ‘Jezusi po’, ‘Kisha Jo’! (duartrokitje)
Ky Jezus individualistik që është zgjedhur, është një Jezus i krijuar nga fantazia.
Nuk mund ta kemi Jezusin pa realitetin që ka krijuar, në të cilin komunikon përmes
kungimit shenjt. Ndërmjet Birit të Zotit, që u mishërua dhe Kishës së tij ekziston
një bashkim i thellë, i pandarshëm, misterioz në fuqi të të cilit Krishti është i
pranishëm sot në popullin e vet, e kjo prani e tij në bashkësinë ku ai na dhurohet
gjithnjë, është edhe shkaku i gëzimit tonë. Po, Krishti është me ne. Mbretëria e Zotit
vjen! Nën rrezet e një dielli që të kujtonte se pranvera është fare pranë,
para se të fillonte katekizmin, Benedikti XVI i kumtoi turmës së mbledhur para bazilikës
së Shën Pjetrit se në takimet e së mërkurës do të fillojë ciklin kushtuar “misterit
të lidhjes ndërmjet Krishtit e Kishës”. Kisha - shpjegoi Papa - është e ngritur mbi
themelin e Apostujve si bashkësi feje, shprese e dashurie, pavarësisht nga kufizimet
e nga hijet e njerëzve që i shërbejnë, me natyrë të brishtë e mëkatare si të gjithë
njerëzit. Papa vuri me forcë në dukje figurat e nxënësve, si dëshmitarë të zgjedhur
nga Krishti, për të përhapur në botë të vërtetën e Ungjillit, por posaçërisht si gjymtyrë
të një korpi të vetëm: “Misioni i tyre nuk është i izoluar, por vendoset brënda
misterit të bashkimit, në të cilin merr pjesë mbarë populli i Zotit, mister që realizohet
me etapa, duke nisur nga Besëlidhja e Vjetër deri tek e Reja (...) Prandaj, që nga
çasti i parë i veprimtarisë së tij shëlbuese, Jezusi i Nazaretit përpiqet ta mbledhë
Popullin e Zotit. Ndonëse predikimi i tij është gjithnjë thirrje për pendesë personale,
ai në të vërtetë synon vazhdimisht në krijimin e popullit të Zotit të cilin ka ardhur
ta bashkojë e ta . E këtu Benedikti XVI iu kundërvu, si një ideje pa themel,
shpjegimit “individualistik” të kumtimit të Krishtit, mbështetur nga teologu i madh
liberal Adolf fon Harnak. Ky teolog - vijoi Ati i Shenjtë – e shikon ardhjen e Krishtit
si akt të lidhur me çdo njeri që e mirëpret, ndërsa misioni i Krishtit – përsëriti
Ati i Shenjtë – ka një qëllim komunitar, gjë që e dëshmon vetë ekzistenca e të Dymbëdhjetëve,
të cilët simbolizojnë dymbëdhjetë fiset e popullit të vjetër të Besëlidhjes – e tani
bëhen “thirrje drejtuar mbarë Izraelit që të pendohet e të hyjë në Besëlidhjen e Re,
si përmbushje e plotë dhe e përkryer e Besëlidhjes së Vjetër. Gjatë katekizmit,
shqiptuar përmbledhtas në më se dhjetë gjuhë të ndryshme, Benedikti XVI u rikthye
tek tema e solidaritetit që gjallëron Kreshmët: “Zemrat tuaja të jenë edhe më
të hapura ndaj kërkesave të të afërmve që kanë nevojë, duke e dëshmuar kështu me jetën
tuaj Krishtin, që u dënua për ne duke na dashur deri në fund të fundit.” Ndërmjet
shtegtarëve të pranishëm – me të cilët Papa u ndalua gjatë pas përfundimit të audiencës,
Benedikti XVI i drejtoi një përshëndetje të posaçme “Bashkimit të krishterë të drejtuesve
sipërmarrës” dhe “Këshillit italian të ekspertëve industrialë”, të kryesuar nga kryeipeshkvi
Gjani Danci. I nxis të gjithë – tha Papa – të japin një dëshmi koherente të krishterë
në fushat e ndryshme të jetës e të punës”.