Ftesa e Papës në lutjen e Ëngjëllit të Tënzot: ta dëgjosh Krishtin në Shkrimin Shenjt,
në ngjarjet, posaçërisht në më të vegjlit e më të varfërit
(14. 03. 06
R.V.) Ftesa e Benediktit XVI për ta dëgjuar e për ta medituar me vëmendje më të
madhe Fjalën e Zotit në kohën e Kreshmëve. Papa disa herë ka porositur praktikën e
lectio divina. “Zoti na flet gjithnjë, por pret nga ne më shumë vëmendje,
posaçërisht në këtë kohë Kreshmësh.”. Kështu u shpreh Papa në lutjen e Engjëllit të
Tënzot të së dielës së kaluar, duke i ftuar besimtarët ta meditojnë më thellësisht
Fjalën e Zotit në këtë kohë të fortë liturgjike. E më se një herë gjatë vitit të parë
të papnisë së Tij, Benedikti XVI ka këshilluar kthimin tek praktika tepër e lashtë
e lectio divina, apo e leximit shpirtëror të Shkrimit Shenjt. **** Benedikti
XVI këshillon lectio divina apo “leximin e rregullt të Shkrimit Shenjt shoqëruar me
lutje”, që realizon atë bisedë intime në të cilën, duke lexuar, dëgjohet Zoti që flet
e, duke u lutur, përgjigja me zemër të hapur plot besim. Por t’i dëgjojmë drejtpërdrejtë
fjalët e Papës, që na shpjegon ç’është lectio divina: *** “Kjo do
të thotë të përqëndrohesh për një kohë të gjatë mbi një tekst biblik, duke e lexuar
e rilexuar, gati duke e “ripërtypur”, si thonë etërit e Kishës, e, duke ia shtrydhur,
si të thuash, gjithë lëngun, sepse ushqen meditimin e kundrimin dhe arrin të ushqejë,
si limfë, jetën konkrete. Kushti i lectio divina është që mendja e zemra të shndriten
nga Shpirti Shenjt, dmth nga vetë Frymëzuesi i Shkrimeve Shenjte, e të përqendrohen
në sjelljen fetare të dëgjimit”. *** Eprori i bashkësisë mungare
të Bosesë, Enzo Bianchi, pohon se lectio divina “vlen jo për çka mund të fitojmë
prej saj, për çka mund të kemi, por për çka na bën të jemi”. Kardinali Karlo
Maria Martini kujton 8 kambët e shkallës të lectio divina: mbi të gjitha, leximin
e përsëritur, të qetë e të zellshëm të Shkrimit Shenjt, duke u përpjekur për t’u
mbrujtur nga Fjala e Zotit. Më pas meditimin, që do të thotë të përpiqesh për
të kuptuar çfarë më thotë mua, personalisht, kjo Fjalë e Zotit. Oratio-n pastaj,
apo lutjen e vetvetishme, kërkimin e faljes, të dritës ose të ofertës. Contemplatio
apo kundrimi do të thotë të qëndrosh me dashuri para tekstit në heshtje
të plotë e në adhurim për Atë që është Shëlbuesi im. Consolatio – apo ngushëllimi
është gëzimi që buron nga lutja, ndjesia e thellë e shijimit të gjërave të Zotit.
Prej këndej – pohon kardinali Martini – të krishterit i lindin ide të guximshme. Shkallarja
e gjashtë është Discretio, gjykimi: kjo do të thotë ta dallosh atë që
është ungjillore nga ajo që nuk është. Deliberatio është vendimi i shpirtëror
për të kryer atë që Zoti më ka bërë të dëgjoj; e kjo të çon në shkallaren e tetët,
në Actio, fryt i pjekur i gjithë shtegtimit, që do të thotë ta vësh në jetë
Fjalën e dëgjuar. Jeta njerëzore – tha Papa në lutjen e Engjëllit të Tënzot të
së dielës së kaluar- “është një rrugë feje e, si e tillë, rrjedh më shumë në gjysmë
hije, sesa në dritë të plotë, e nuk i mungojnë edhe çastet e errësirës, madje të errësirës
së plotë”. Është Fjala e Zotit që ndez në ne një dritë të brëndshme në rrugët
e jetës. Prandaj Papa i ftoi të gjithë të ecin në gjurmët e Virgjërës Mari, e cila
e ruante dhe e meditonte vazhdimisht në zemër të vet Fjalën e Zotit: ***“Ja
pra dhurata dhe impenjimi për secilin nga ne në periudhën kreshmore - porositi
Benedikti XVI. Duhet ta dëgjojmë Krishtin në Shkrimin Shenjt e ndër vetë ngjarjet
e jetës sonë, për të lexuar mesazhet e Provanisë hyjnore, ta dëgjojmë ndër vëllezërit,
posaçërisht ndër të vegjlit e të varfërit, ku Jezusi kërkon dashuri konkrete. Ta dëgjosh
Krishtin e t’i bindesh zërit të Tij: kjo është udha kryesore, e vetmja, që çon në
gëzimin e plotë të dashurisë”.