Papa në lutjen e Engjëllit të Tënzot: për t’u bërë vërtetë të lirë, duhet përballuar
prova e tundimit
(6 mars 2006 R.V.)Gjatë Lutjes së Engjëllit të Tënzot, në të Dielën e parë të Kreshmëve,
Papa Benedikti XVI theksoi se për të qenë vërtetë të lirë, duhet përballuar prova
e tundimit. “Për ta realizuar plotësisht jetën në liri, duhet përballuar prova
që e mbart vetë liria: tundimi”- këtë theksoi dje Papa në Lutjen e Engjëllit të Tënzot
dhe i ftoi besimtarët ta jetojnë këtë kohë të fortë, duke e rishikuar me vëmendje
jetën e tyre, për të vijuar me guxim rrugën drejt Pashkëve të Jezusit, burim i dhembshurisë. *** Papa
ia kushtoi Lutjen kryesisht Kohës së Kreshmëve, që i nxit të krishterët të impenjohen
në rrugën e përgatitjes për Pashkë. Duke kumtuar Ungjillin e djeshëm, Benedikti XVI
kujtoi kohën që kaloi Jezusi në shkretëtirë, ku përballoi tundimin nga ana e Shejtanit: *** “Duke
ndjekur Mësuesin dhe Zotin e tyre, edhe të krishterët hyjnë shpirtërisht në shkretëtirën
kreshmore, për ta përballuar së bashku me Të luftën kundër shpirtit të së keqes”.
*** Figura e shkretëtirës – nënvizoi Ati i Shenjtë – është metaforë që flet
vetë për jetën njerëzore. Libri i Daljes rrëfen përvojën e popullit të Izraelit i
cili, si doli nga Egjipti, shtegtoi në shkretëtirën e Sinait për dyzet vjet, para
se të arrinte në tokën e premtuar: *** “Në këtë shtegtim të gjatë, hebrenjtë
provojnë tërë forcën dhe këmbënguljen e tunduesit, që i shtynte ta humbisnin shpresën
në Zotin e të ktheheshin mbrapa; por në të njëjtën kohë, falë ndërmjetësimit të Moisiut,
mësuan të dëgjojnë zërin e Zotit, që i thërriste të bëheshin populli i tij i shenjtë.
Duke medituar mbi këtë faqe biblike, kuptojmë se për ta realizuar plotësisht jetën
në liri, duhet kapërcyer prova që mbart vetë liria, dmth, tundimi. Vetëm pasi të
çlirohet nga skllavëria e gënjeshtrës dhe e mëkatit, njeriu, në saje të nënshtrimit
ndaj fesë, ia hap zemrën së vërtetës, gjen kuptimin e plotë të jetës së vet, gjen
paqen, dashurinë, gëzimin”. *** Pikërisht për këtë – shtoi Papa – Kreshmët janë
kohë e favorshme për rishikimin e jetës në gjunj para Zotit, në lutje e në pendesë.
Papa kujtoi edhe se mbrëmë do të fillonte Ushtrimet Shpirtërore me bashkëpunëtorët
e Kuries Romake: *** “Të dashur vëllezër e motra, ndërsa ju ftoj të më shoqëroni
me lutjet tuaja, ju siguroj se ju kujtoj në Tënzonë, me qëllim që Kreshmët të jenë
për gjithë të krishterët rast për pendesë e për shtytje të guximshme drejt shenjtërisë” *** Pas
Lutjes të Engjëllit të Tënzot, Benedikti XVI kujtoi se të shtunën e ardhshme, më 11
mars, në orën 17, në Sallën e Palit VI, do të mbahet një mbrëmje lutjeje mariane,
organizuar nga të rinjtë universitarë të Romës. Në të, në saje të lidhjeve radio-televizive,
do të marrin pjesë edhe shumë studentë të vendeve të tjera evropiane e afrikane: *** “Do
të jetë një rast i përshtatshëm për t’iu lutur Zojës së Bekuar që Ungjilli të hapë
udhë të reja bashkëpunimi ndërmjet popujve të Evropës e të Afrikës. Të dashur të rinj,
ju pres të shumnumërt!”.