Thirrje e Papës kundër racizmit në sport, para ndeshjes miqësore të futbollit Itali-Gjermani:
me ne imzot Klaudio Manjago
Një thirrje kundër racizmit, për promovimin e dialogut e të respektit në çdo mjedis
shoqëror: mbrëmë Imzot Maniago lexoi, në stadiumin Franki të Firences, mesazhin e
Papës me rastin e ndeshjes së futbollit Itali-Gjermani. Dialog e respekt janë dy
termat kyçe të mesazhit – që jehuan në një stadium përplot me tifozë, pasi kohët e
fundit janë shumëfishuar episodet me sfond racist: kore kundër lojtarëve me ngjyrë
ose parulla kundër hebrenjve. Për këtë ngjarje të rrallë, flet në mikrofonin e radios
sonë, imzot Klaudio Maniago, ipeshkëv-ndihmës i Firences: *** “Mesazhi që Ati
i Shenjtë deshi të dërgonte pikërisht me rastin e kësaj ndeshjeje në stadiumin Franki,
përfaqëson një sinjal, sinjalin e një shikimi të ndryshëm. Sporti, kujton Papa, është
një fushë veprimtarie ku vërtetë mund të shikohet me sy të ndryshëm, ku solidariteti,
miqësia, dashamirësia, ndonëse në frymën e garës, mund të bëhen vërtetë sinjal, madje
në një farë mënyre, laborator për të krijuar një qytetërim të ndryshëm, qytetërimin
e dashurisë. Edhe në fillim të Lojrave Olimpike, Ati i Shenjtë shprehu mendimin
tij për fushat e sportit si vend takimi ndërmjet racave të ndryshme, me frymën e solidaritetit
e të paqes, kundër çdo forme të racizmit”.