Kreshmë do të thotë të dëshmosh Ungjillin e solidaritetit ndaj të varfërve:tha Benedikti
XVI në audiencën e përgjithshme
të së Mërkurës së
Përhime, Benedikti XVI u drejtoi besimtarëve ftesën ta dëshmojnë të vërtetën e Ungjillit
dhe solidaritetin ndaj më të varfërve, ndërsa një grupi udhëheqësish fetarë hebrenj
e myslimanë – përshëndetjen e vet të përzemërt. “Të jetohen Kreshmët si çast kthese
në rrugën e dashurisë ndaj të afërmit e të së vërtetës të Ungjillit, duke iu kundërvënë
gënjeshtrës që e helmon njerëzimin”. Kjo ishte thirrja që Papa Benedikti XVI u drejtoi
të krishterëve nga audienca e përgjithshme, mbajtur në Sheshin e Shën Pjetrit, duke
i ftuar për kthimin e zemrave. Ndërmjet 12 mijë vetëve, të pranishëm në audiencë,
edhe një grup udhëheqësish hebrenj e myslimanë, me të cilët Ati i Shenjtë shkëmbeu
përshëndetje të përzemërta. Me fillimin e Kreshmëve, të krishterët zbresin së bashku
me Jezusin në shkretëtirë. E me Të luten, reflektojnë, agjërojnë, por mbi të gjitha,
rizbulojnë dashurinë ndaj të afërmit, posaçërisht ndaj të varfërve. Kreshmët janë
kohë e privilegjuar për dashurinë, që bëhet bamirësi, që i krijon zemrës kushtet të
bëjë kthesën e madhe. Përkimi i të Mërkurës së Përhime me audiencën e përgjithshme,
e nxiti Benediktin XVI t’ia kushtonte katekizmin përmbajtjes së thellë liturgjike,
që do të arrijë kulmin me Triditshen e Pashkëve: *** “Sot nisim një rrugë reflektimi
e lutjeje me të gjithë të krishterët e botës, për t’u drejtuar shpirtërisht nga Kalvari,
duke medituar misteret kryesore të fesë. Përgatitemi kështu të provojmë, pas misterit
të Kryqit, gëzimin e Pashkëve të ngjalljes”. *** Simboli i hirit të vendosur
mbi kokë – shpjegoi Papa – ka kuptimin e një nxitjeje shpirtërore: duke e ditur mirë
sa e përkohshme është jeta njerëzore, na nxit ta mbështesim çdo çast shpresën vetëm
në Zotin, duke u bashkuar personalisht e bashkërisht, me fjalën e Ungjillit: “Fjalë
e së vërtetës” të cilën – nënvozi Papa – duhet ta dëshmojë çdo i krishterë: *** “Jeta
e të krishterit është jetë feje, e themeluar mbi Fjalën e Zotit dhe e ushqyer prej
saj. Në provat e jetës e në çdo tundim, e fshehta e fitores qëndron në dëgjimin e
Fjalës të së vërtetës e në mospranimin e vendosur të mashtrimit e të së keqes. Ky
është programi i vërtetë e qëndror i Kohës së Kreshmëve: të dëgjojmë Fjalën e së Vërtetës;
të jetojmë, të flasim e të veprojmë sipas së vërtetës e ta refuzojmë gënjeshtrën që
helmon njerëzimin dhe e çon drejt të gjitha të këqijave”. *** Kreshmët – vijoi
Benedikti XVI, na nxisin të ecim në rrugën asketike e liturgjike që, nga njëra anë
na bën t’ia hapim zemrën dashurisë së dhembshur të Krishtit, e nga ana tjetër, na
krijon kushte t’i shikojmë me sy të ri vëllezërit e nevojat e tyre: *** ”Kush
fillon ta shikojë Zotin (...) e shikon me sy të tjerë edhe vëllaun. E zbulon vëllaun
dhe nevojat e tij. Prandaj Kreshmët, si kohë kur dëgjojmë të Vërtetën, janë njëkohësisht
çast i favorshëm për t’u kthyer në rrugën e dashurisë (...). Të kthehemi, pra, medoemos,
tek dashuria!”. *** Këto fjalë, të thëna jashtë tekstit zyrtar, bënë që Papa
të kujtonte tri përmasat që karakterizojnë këtë periudhë pendestare, përmendur edhe
në Mesazhin e Tij të Kreshmëve: agjërimin, pendesën e posaçërisht, lëmoshën, ose
më mirë të themi, solidaritetin: *** “Të jenë ditë reflektimi e lutjeje të vazhdueshme,
në të cilat ta lemë veten të udhëhiqemi nga Fjala e Zotit, që na e propozon begatisht
liturgjia. Kreshmët të jenë edhe kohë agjërimi, pendese e vigjilence ndaj vetvetes,
me bindjen se lufta kundër mëkatit nuk mbaron kurrë, sepse tundimi është realitet
i përditshëm, ashtu si brishtësia e iluzionet janë përvojë e të gjithëve. Kreshmët
të jenë, së fundi, edhe rast i ndarjes së sinqertë të dhuratave që kemi marrë, me
vëllezërit si dhe vëmendjeje ndaj nevojave të njerëzve të varfër e të braktisur. ***
Përshëndetjes drejtuar grupit të myslimanëve dhe hebrenjve – me të cilët Papa
u takua gjatë audiencës, në sa përshkonte në këmbë rrugën drejt veturës - i paraprinë
fjalët e mirëseardhjes që Ati i Shenjtë i drejtoi Komitetit Papnor të Shkencave Historike,
Kolegjit të Shën Izaisë, me rastin e njëqind vjetorit të këtij institucioni të urdhërit
Antonian Maronit, si dhe meshtarëve të ardhshëm të Seminarit ndërdioqezan të Tarantos.
“Të dashur seminaristë – u tha atyre Papa – ju ftoj ta ndërtoni jetën tuaj mbi shkëmbin
e patundur të Fjalës së Zotit, për të qenë kështu, lajmëtarë të guximshëm të Ungjillit
të Krishtit në kohën tonë”.