Të jeni ndërtues urash, veprimtarë të paqes: kështu i porositi Benedikti XVI ipeshkvijtë
e Bosnjë-Hercegovinës, që i priti në përfundim të vizitës së tyre ad limina.
“Pas viteve
të trishtuara të luftës së fundit, ju sot, si veprimtarë të paqes, jeni të thirrur
ta forconi bashkimin e të punoni me frymën e mëshirës, të mirëkuptimit e të faljes,
në emër të Krishtit, si brënda bashkësisë së krishterë, ashtu edhe në indin e ndërlikuar
shoqëror të Bosnjë-Hercegovinës”. E di mirë – shtoi Ati i Shenjtë –
se misioni juaj nuk është aspak i lehtë, ashtu siç e di edhe se i mbani gjithnjë sytë
të ngulur tek Krishtit i cili, si i deshi të gjithë deri në fund të fundit, u ngarkoi
nxënësve të vet një detyrë themelore, që i përfshin të gjitha të tjerat: detyrën të
duan! Dashuria – nënvizoi Ati i Shenjtë - për të qenë frytdhënëse në planin shpirtëror,
nuk duhet të ndjekë thjeshtë ligjet tokësore, por duhet ta lërë veten të ndriçohet
nga e vërteta, që është Zoti e të shprehet në atë masë të lartë të drejtësisë, që
është mëshira. Duke u nisur nga dashuria, ipeshkvijtë nuk çkurajohen përballë
problemeve që e mundojnë Bosnjën. E pikërisht tek këto probleme e vështirësi u ndalua
Papa. Në mënyrë të veçantë kujtoi problemin e mërgimtarëve për të cilët – tha Ati
i Shenjtë – uroj të përfundojnë marrëveshje të përshtatshme që sigurojnë të drejtat
e të gjithëve. Më pas theksoi edhe nevojën e barazisë ndërmjet nënshtetasve të feve
të ndryshme, urgjencën e masave që parashikojnë punësimin e të rinjve, duke pasur
parasyh papunësinë e theksuar e sidomos uroi zbutjen e tensioneve ndërmjet etnive,
trashëguar nga ngjarjet e ndërlikuara historike të këtyre trojeve. Në rrethana
të tilla, Papa vuri në dukje se emërimi, kohët e fundit, i një nunci me seli në vend,
është tregues i afërsisë së Selisë Apostolike pranë instancave të ndryshme të Bosnjë-Hercegovinës.
Por Benedikti XVI nënvizoi edhe disa shqetësime që kanë të bëjnë me jetën e dioqezave
boshnjake. Në mënyrë të posaçme i porositi ipeshkvijtë të bëjnë të gjitha përpjekjet
që të forcohet gjithnjë më shumë bashkimi i grigjës së Krishtit. Bashkim ndërmjte
barinjve e rregulltarëve, ndërmjet klerit dioqezan e personave të përkushtuar – këtë
nënvizoi fuqimisht Benedikti XVI – por edhe ndërmjet atyre që janë në shërbim të popullit
të krishterë, duke kapërcyer, në se do të ishte e nevojshme, keqkuptimet dhe vështirësitë
që lidhen me ngjarjet e së kaluarës. Nga ana e tij Kardinali Puljiç, kryeipeshkëv
i Sarajevës, ripohoi impenjimin e episkopatit për të “risjellë paqën e për të krijuar
një atmosferë pajtimi”. E këtë – pavarësisht nga qëndrimi i përfaqësuesve të Bashkësisë
evropiane që – deklaroi Benedikti XVI, i mbyllin vazhdimisht veshët, për të mos i
dëgjuar nismat, propozimet dhe kërkesat që bëhen nga ana e prelatëve. Për ta kuptuar
sa e thellë është dhimbja jonë – shtoi Kardinali – mjafton të kujtojmë se para konfliktit,
katër dioqezat tona kishin rreth 820. 000 besimtarë, ndërsa sot kanë mbetur vetëm
466. 000. Shumë njerëz – vijoi Hirësia e Tij - janë larguar nga vendi ynë e me sa
duket nuk do të kthehen kurrë më. Të tjerët, që dëshirojnë të kthehen, ndeshen menjëherë
me indiferencën dhe apatinë ndaj aspiratave të tyre, si nga ana e politikanëve vendas,
ashtu edhe nga ana e përfaqësuesve të Bashkësisë Ndërkombëtare. Kardinali ripohoi
edhe se jo pak kisha famullitare, kanonike, kuvende e ndërtesa të tjera janë shkatërruar
ose dëmtuar rëndë. Pavarësisht nga kjo e me shumë mundim – e siguroi Papën Kardinali
Puljiç, po përpiqemi me të gjitha forcat të ngjallim shpresat në zemrat e të gjithëve
edhe nëpërmjet rindërtimit të gjërave që janë shkatërruar.