Më 23 shkurt, sipas kalendarit liturgjik, kisha përkujton Shën Polikarpin e Izmirit,
ipeshkëv dhe martir, nxënës i Shën Gjonit Apostull.
Polikarpi, pra i njohu
nga afër Shën Gjonin Apostull dhe të tjerët apostuj që e kishin parë Zotërinë Jezus.
Prandaj na paraqitet si dëshmitar i jetës apsotolike dhe njeri i traditës së gjallë,
siç shkruan ai vetë në letrat drejtuar filipianëve e maqedonëve të krishterë. Polikarpi
jetoi në heshtje e fshehtësi, duke mos pasur besim në forcat e veta, sepse tepër plak
dhe i lodhur. Por kur i erdhi koha të dilte haptas e publikisht, diti ta mbrojë dhe
kumtojë me një guxim të jashtëzakonshëm fenë e vet në Krishtin. Fundin e tij e
njohim nga një dokument, që mban datën e 23 shkurtit të vitit 155. Eshtë një tregim
me vlerë të madhe historike, agjiografike e liturgjike. I zvaritur para Prokonsullit
Stacio Kuadratit- rrëfehet në dokument – Polikarpi u ftua ta mohonte Krishtin, por
ai u përgjigj me këto fjalë duke tundur kokën: “Që prej 86 vejtësh i shërbej e nuk
më ka bërë kurrnjë të keqe: e si të blasfemoj kundër Mbretit tim që më shëlboi? -
A e di se mund të të djeg përsëgjalli? – i tha Prokonsulli. - Zjarri me të cilin
më kërcënoni – përgjegji Shën Polikarpi – të djeg për një çast, por pastaj kalon;
unë ia kam frikën zjarrit të amshuar të dënimit!” E ndërsa digjej i gjallë në mesin
e amfiteatrit të Smirnës (Izmirit të sotëm), Polikarpi i lartonte Zotit një uratë
të shkurtër, por nga zemra: “O Zot, qoftë lavdëruar emri yt i adhuruar në shekuj të
shekujve, nga Jezu Krishti, meshtar i amshuar e i gjithspushtetshëm – e qoftë i nderuar
emri yt së bashku me Jezusin e Shpirtin Shenjt sot e përgjithmonë e jetës!”. E
sakaq, trupi i pjekur nga zjarrim u shndërrue në një grusht hi. Mbetën, siò vijon
të tregojë dokumenti i përmendur- vetëm pak eshtra, që u ruajtèn si gurë të çmuar
dëshmie në Krishtin e Gjallë.