Kujtojmë se figura e kardinalit nuk është e huaj për historinë e Kishës katolike
ndër Shqipëtarë. Për herë të parë u fol për krijimin e një kardinali shqiptar kur
Shqipëria, nën udhëheqjen e Gjergj Kastriotit, u bë kështjellë e pathyeshme përballë
vërshimit të turqëve osmanë drejtë Evropës ku, siç qe shprehur Sulltan Mehmet Fatihu,
ëndërronin të vinin gjysmë- hënën mbi bazilikën e Shën Pjetrit dhe çallmën mbi kokën
e papës. Në ato kohë të turbullta e të rrezikshme, qe menduar të krijohej kardinali
i parë shqiptar. Një krijim i tillë do të luante rol të dorës së parë në tërheqjen
e vëmendjes ndërkombëtare nga vendi i vogël që po luftonte heroikisht e, sidomos
në bashkimin e Evropës së krishterë në luftën kundër armikut të përbashkët. U fol,
pra, për imzot Pal Engjëllin, aso kohe kryeipeshkëv i Durrësit dhe një nga bashkëpunëtorët
më të ngushtë të Kastriotit. Emrin e tij e njeh çdo shqiptar që di shkrim e këndim,
sepse me të, si autor i dokumentit të parë të shqipes, ‘Formulës së Pagëzimit’, nis
edhe historia e shqipes së shkruar. Por ndoshta pikërisht për arsye të trazimeve të
rënda të kohës, mundësia për krijimin e një kardinali shqiptar mbeti vetëm ëndërr.
Shumë dallgë të tmerrshme do të përplaseshin mbi Shqipërinë edhe Kishën e saj derisa
kjo ëndërr të bëhej realitet. *** E pikërisht për të tërhequr vëmendjen e botës
nga vendi më i martirizuar nën diktaturën komuniste, që sapo kishte nisur hapat e
parë drejt lirisë së ëndërruar kombëtare e fetare, Papa Gjon Pali II do të zgjidhte
ndërmjet klerikëve shqiptarë të shpëtuar nga burgjet dhe kampet e përqëndrimit, kardinalin
e parë shqiptar, Hirësinë e Tij, Mikel Koliqin, të cilin Ati i Shenjtë e emëroi prelat
nderi në janar 1992, e takoi personalisht gjatë vizitës së tij në Shqipëri, më 25
prill 1993 dhe e krijoi kardinal më 26 nëntor 1994. Duke e pritur në audiencë më
28 nëntor 1994 Gjon Pali II do ta përgëzonte kardinalin e parë shqiptar me këto
fjalë: *** ... Pas dimrit të ashpër të kundërshtimit të dhunshëm, Kisha shqiptare,
së bashku me Ju, mund ta shohë me shpresë të ardhmen. Dëshiroj t’ju shpreh,
Zotëri Kardinal, mirënjohjen e thellë për shembullin e dëshmisë së patrembur ungjillore
që keni dhënë gjatë kryerjes së shërbimit meshtarak. *** Këtyre fjalëve
plot mirënjohje të Papës Gjon Pali II, Kardinali Koliqi do t’i përgjigjej: *** “Të
gjithë e njohin dashuninë që ka Shenjtnia Juej për popullin shqiptar, dhe këtë e keni
tregue shumë herë; e kuptova këtë qysh prej fjalimit Tuej në Otranto, në sa unë isha
ende në burg. E këtë e tregoi edhe Ardhja Juej në Shqipni për rivendosjen e Hjerarkisë,
kremtue solemnisht, që zgjoi aq shumë entuziazëm në popull e që pati jehonë në mbarë
botën. Tashti emënimi kardinal ban të drejtohen sytë e botës mbi Atdheun tonë të harruem
prej të gjithëve”.Por ta dëgjojmë vetë Kardinalin Koliqi, nga arkivi jonë në të
cilin ruhen qindra zëra .