Më 24 mars do të mbahet Koncistori për krijimin e 15 kardinajve të rinj
Sot më 22 shkurt Benedikti XVI njoftoi se Koncistori i parë i papnisë së tij, për
krijimin e 15 kardinajve të rinj, do të mblidhet më 24 marsin e ardhshëm. Lajmi
i pritur u dha sot paradite në festën e Katedrës së Pjetrit, gjatë audiencës së përgjithshme.
Ishin të pranishëm, në Bazilikën e Vatikanit dhe në sallën e Palit VI, rreth 14 mijë
besimtarë, ndërmjet të cilëve, mijëra të rinj. Koncistori – njoftoi Benedikti XVI
në përfundim të katekizmit – do të kremtohet më 24 mars, pasi do të paraprihet, më
23 mars, nga një takim reflektimi e lutjeje që Papa do ta mbajë me të gjithë Kolegjin
kardinalor e do të pasohet, të shtunën, nga një bashkëkremtim solemn, i kryesuar nga
Ati i Shenjtë së bashku me kardinajtë e rinj. *** “Ky njoftim jepet me
vend në festën e Katedrës, sepse Kardinajtë kanë për detyrë ta mbështesin e ta ndihmojnë
Pasardhësin e Pjetrit në kryerjen e shërbimit apostolik që i është besuar në drejtimin
e Kishës. Por, të njihemi me listën e Princave të rinj të Kishës në të cilën,
siç vërejti Papa – pasqyrohet plotësisht universaliteti i saj: ata përfaqësojnë vende
të ndryshme të botës dhe kryejnë funksione të ndryshme në shërbim të Popullit të Zotit: imzot
UILJAM JOZEF LEVADA, prefekt i Kongregatës për Doktrinën e Fesë; imzot FRANC RODÉ,
prefekt i Kongregatës për Institutet e Jetës Rregulltare dhe Shoqëritë e Jetës Apostolike; imzot
AGOSTINO VALINI, prefekt i Gjykatës së Lartë të Senjaturës Apostolike; imzot HORHE
LIBERATO UROZA SAVINO, kryeipeshkëv i Karakasit; imzot GAUDENZIO B. ROZALES, kryeipeshkëv
Manilës; imzot ZHAN-PERRE RIKARD, kryeipeshkëv i Bordosë; imzot ANTONIO KANIZARES
LLOVERA, kryeipeshkëv i Toledos; imzot NIKOLAS ÇEONG-ZHIN SUK, kryeipeshkëv i Seulit; imzot
SHON PATRIK O’ MALI, kryeipeshkëv Bostonit; imzot STANISLAU DXHIVISH, kryeipeshkëv
i Krakovisë imzot KARLO KAFARRA, kryeipeshkëv i Bolonjës; imzot JOZEF ZHEN ZHE-KIUN,
kryeipeshkëv i Hong-Kongut. Përveç këtyre 12 kardinajve të rinj, Papa vendosi të
lartojë në dinjitetin kardinalor tre kishtarë me moshë mbi 80-vjeç, duke pasur parasysh
shërbimin që i kanë bërë Kishës me besnikëri shembullore e përkushtim të admirueshëm
– siç nënvizoi vetë Benedikti XVI. Është fjala për: imzot ANDREA KORDERO LANCA
DI MONTEXEMOLO, Kryeprift i Bazilikës së Shën Palit jashtë mureve të Romës; Imzot
PETER POREKU DERI, kryeipeshkëv nderi i Tamalit (Ganë); Atë ALBERT VANHOI, ish-
Rektor i Institutit Papnor Biblik dhe ish- Sekretar i Komisionit Papnor Biblik. Duke
u kthyer tek kronika e audiencës së përgjithshme, në festën e sotme të Katedrës së
Shën Pjetrit, Papa kujtoi se kjo është një traditë e lashtë, që fillon nga shekulli
IV – dhe u kërkoi rreth 3 mijë të rinjve, të mbledhur në bazilikën Shën Pjetrit –
ta ushqejnë jetën personale e komunitare të kësaj feje që është themeluar mbi dëshminë
e Pjetrit e të Apostujve të tjerë. Të kremtosh “Katedrën e Shën Pjetrit” – shpjegoi
Benedikti XVI – do të thotë t’i japësh asaj një domethënie të thellë shpirtërore e
të pranosh një shenjë të privilegjuar të dashurisë së Zotit, Bariut të mirë e të amshuar,
i cili dëshiron ta mbledhë mbarë Kishën e vet e t’i prijë në udhën e shëlbimit. Katedra
e Ipeshkvit të Romës përfaqëson jo vetëm shërbimin e Tij ndaj bashkësisë romake,
por misionin e prijësit të mbarë popullit të Zotit. Prandaj Benedikti XVI i ftoi të
gjithë besimtarët që në këtë ditë të shkojnë fizikisht ose shpirtërisht pranë katedrës
të Apostullit, në bazilikën Shën Pjetrit e aty të luten në mënyrë të posaçme për Ministerin
e tij: “Duke çuar sytë nga vetrata e alabastrit që hapet pikërisht përmbi katedrën,
lutjuni Shpirtit Shenjt që ta mbështesë gjithnjë me dritën e tij e me forcën e tij
shërbimin tim të përditshëm ndaj mbarë Kishës”. Kardinajtë e rinj – siç tha
Papa – e pasqyrojnë mirë universalitetin e Kishës: 8 vijnë nga Evropa, 3 nga kontinenti
amerikan, 3 nga Azia e 1 nga Afrika. Me emërimet e reja numri i kardinajve arrin në
193, nga të cilët 120 me të drejtë zgjedhore, duke pasur parasysh se më 24 mars, ditë
e Koncistorit, kardinali ivorian Agré dhe kardinali irlandez Konel do të kenë mbushur
80 vjet. Me këto emërime gjeografia e re kardinalore përbëhet nga 100 kardinaj evropianë,
32 latino-amerikanë, 20 veriamerikanë, 20 aziatikë, 17 afrikanë e 4 nga Oqeania. Ditë
emocionesh të thella e të paharrueshme për kardinajtë e rinj. Të ndjekim reagimin
e jezuitit Atë Albert Vanhoi, ish rektor i Institutit Papnor Biblik e ish-
Sekretar i Komisionit Papnor Biblik:Përsa i përket personit tim modest, mbeta vërtetë
i mahnitur, sepse nuk e prisja fare. Qe një lajm krejtësisht i papritur. Por, duke
reflektuar, kuptova se Ati i Shenjtë ka qenë i kënaqur nga bashkëpunimi im kur isha
sekretar i Komisionit Biblik për 11 vjet. Isha, pra, bashkëpunëtori i tij i drejtpërdrejtë
për këtë detyrë të Kishës. E vlerësova këtë qëndrim delikat të Papës, i cili është
kujtuar për një ish-bashkëpunëtor, që vërtetë nuk e meritonte këtë emërim kaq fisnik.