15 лiстапада ў клаузуры Дома св.Сергiя, у тасканскiм горадзе Сеттiньяно, памёр вядомы
iтальянскi тэолаг, пiсьменнiк i паэт дон Дiво Барсоттi. У красавiку бягучага года
яму павiнна было споўнiцца 92 гады. Дон Дiво лiчыўся адным з буйнейшых знаўцаў усходняга
манаства. За доўгiя гады жыцця ён напiсаў больш за 150 кнiг, прысвецiўшы iх тлумачэнням
да Святога Пiсання, жыццярысам святых, духоўным даследванням. Асаблiвы поспех атрымалi
наступныя працы нябожчыка: “Духоўнае багаслоў’е св.Яна ад Крыжа”, “Закон ёсць Любоў”,
“Расейскае хрысцiянства”. Дон Барсоттi вёў дыялог з такiмi вядомымi мыслiцелямi ХХ
стагоддзя, як Ханс Урс фон Бальтазар, Томас Мертон, Джузеппе Доссеттi. У 1946 годзе
ён заснаваў суполку “Сыноў Божых”, у склад якой увайшлi як звычайныя свецкiя вернiкi,
так i законнiкi, што вядуць супольны лад жыцця. Цяпер чальцы згаданай суполкi служаць
Богу i людзям не толькi на радзiме заснавальнiка, але i ў Афрыцы, Аўстралii, Лацiнскай
Амерыцы. Дон Дiво Барсоттi выкладаў тэалогiю на тэалагiчным факультэте ў Фларэнцыi,
атрымаў шмат лiтаратурных прэмiй. Яго пяру належыць i першы пераклад на iтальянскую
мову помнiка рускай духоўнай лiтаратуры “Шчырыя аповяды пiлiгрыма сваяму духоўнаму
айцу”.