Vijonë manifestimet në botën islamike kundër karikaturave satirike për Muhametin,
ndërsa gazeta daneze, që i publikoi e para, u kërkon falje besimtarëve myslimanë.
Në mikrofonin e radios sonë, gazetari libanez, Kamill Eid.
Një letër, përmes së cilës u kërkohet falje myslimanëve të mbarë botës për publikimin
e 12 karikaturave të profetit Muhamet, nënshkruar nga drejtori i gazetës daneze Jyllands
Posten, u transmetua nga ambasada e Danimarkës në Algjèri dhe u publikua sot nga disa
gazeta algjeriane. Një gjest që shpreh vullnetin e mirë, por që nuk mjafton për të
paqëtuar manifestimet kundër karikaturave, të cilat janë konsideruar fyese nga bota
islamike. Një nga udhëheqësit talebanë, mullahu Dadullah, ka premtuar si shpërblim
100 kilogram ar për atë që do ta vrasë autorin e karikaturave të Muhametit. Ndërsa
sot, me rastin e festës shiite të Hashures, mijëra njerëz manifestuan kundër karikaturave.
Pikërisht mbi këtë manifestim na flet gazetari libanez, Kamill Eid, specialist
për çështjet e Lindjes së Mesme pranë gazetës italiane ‘Avvenire’, në mikrofonin e
radios sonë: *** - Sot është kulmi i festës së Hashures. Shiitët përkujtojnë
vdekjen e imamit Hysen në betejën e Karbalasë, në vitin 680. Natyrisht, sekretari
i përgjithshëm i hezbollahëve, Nasrallah, e shfrytëzoi këtë festë fetare për të folur
edhe për karikaturat. ***
Si është e mundur që nuk po
duken shenja të pakësimi të kësaj vale protestash?
***
Një shkak i parë duhet kërkuar në faktin se nuk duken as shenja
të pakësimit të ribotimit të këtyre karikaturave nga gazeta të tjera. Një shkak tjetër
është edhe ai se shumë qeveri ose regjime po e shfrytëzojnë këtë valë protestash për
të kërkuar ose për të tentuar të reagojnë ndaj presioneve ndërkombëtare. Kur e them
këtë, kam parasysh Iranin dhe Sirinë. Irani po kalon një çast izolimi ndërkombëtar
për shkak të problemit bërthamor. Siria, njëlloj, jeton e izoluar për shkak të hetimeve
që duhen bërë për të zbuluar vrasësit e Haririrt, të cilit më 14 shkurtin e ardhshëm
do t’i përkujtohet njëvjetori i vdekjes. Kështu si njëri vend, ashtu edhe tjetri,
po përpiqen t’u kundërvihen këtyre presioneve, duke shfrytëzuar valën popullore të
zemërimit kundër fyerjes së Muhametit.
*** - Ja, pikërisht ndër realitete
si Siria dhe Irani, ku manifestimet kanë marrë pamje më të dhunshme, sa mund t’i
quajmë spontane (të vetvetishme)? ***
Ne e dimë se në këto
vende nuk luan as gjethi, në se këtë nuk e dëshiron qeveria. Njëlloj edhe në Liban,
sepse të arrestuarit pas manifestimeve të dhunshme të së dielës së kaluar në Beirut,
janë më shumë sirianë ose palestinezë. Siria ka bërë përpjekje të eksportojë edhe
në vendin fqinj metodën e vet në qëndrimin ndaj manifestimeve.
***
Si po e jetojnë bashkësitë e krishtera këtë çast të vështirë në një
vend si Libani, që ka provuar çaste të tmerrshme edhe pak kohë më parë?
*** -
Po marr një aspekt pozitiv, sepse një ditë pas manifestimit të Beirutit, u takuan
për herë të parë sekretari i përgjithshëm i hezbollahëve, Nasrallah, me liderin e
partisë Formacioni politk i krishterë, gjeneralin Aoun. Pra dy përfaqësuesit më të
mëdhenj politikë të islamit shiit libanez dhe të krishterimit politik libanez takohen
dhe nënshkruajnë një lloj marrëveshjeje, një projekt dialogu, duke i ftuar të bashkëpunojnë
edhe bashkësitë e tjera fetare të Libanit. M’u duk prandaj e arsyeshme ta theksoj
këtë aspekt pozitiv, për ta paraqitur në një dritë më pak dramatike tensionin që të
dielën e kaluar po krijonte rrezikun për shpërthimin e aksidenteve të reja me ngjyrime
fetare në Liban.