Benedikti XVI vendosi ta japë ndjesën e plotë me rastin e kremtimeve për Ditën e 14-të
Botërore të të Sëmurit më 11 shkurtin e ardshem.
Benedikti XVI do të japë ndjesën e plotë me rastin e kremtimeve për Ditën e 14-të
Botërore të të Sëmurit, që do të arrijë kulmin më 11 shkurt, me kremtimin eukaristik
në katedralen australiane të Adelajdes. Udhëzimet e këtij vendimi Papnor janë
në Dekretin që u publikua sot më 3 shkurt nga Kryependestari, kardinali Xhejms Frensis
Staford. *** Benedikti XVI – lexohet në dokument – e jep këtë ndjesë me shpresë
se do të nxisë promovimin e veprave e të nismave të përshpirtërisë popullore dhe të
solidaritetit shoqëror në favor të të sëmurëve, posaçërisht të njerëzve me të meta
mendore, të cilët rrezikohen më shumë për t’u përjashtuar nga shoqëria e madje edhe
nga vetë familja e tyre. Në Mesazhin e tij për Ditën e të Sëmurit, që u publikua
në dhjetorin e kaluar, Papa bën thirrje për t’i shoqëruar mjekimet e duhura, me një
sensibilitet të ri për këtë kategori të sëmurësh, duke vërejtur se në shumë vende
të botës shërbimet ndaj të sëmurëve mendorë mungojnë, janë të pamjaftueshme ose në
shpërbërje. Kështu, më 11 shkurt, në përkujtimin e Zojës Lurdë – besimtarët që
marrin pjesë në ndonjë nga kremtmimet kishtare në katedralen e Adelajdes, ose në vende
të tjera të caktuara nga autoritetet kishtare – lexohet në Dekret – mund ta fitojnë
ndjesën e plotë, pasi të kenë plotësuar këto kushte: të jenë rrëfyer, kunguar e të
jenë lutur sipas ndjeteve të Papës. Dokumenti i Pendestarisë Apostolike u drejtohet
edhe besimtarëve që nuk mund të marrin pjesë ndër kremtime, sepse janë të impenjuar
në spitale ose në shtëpi, në asistencën e të sëmurëve, e sidomos të atyre që – siç
saktëson Dekreti – kërkojnë më tepër kujdes, durim e vëmendje për shkak të të metave
mendore. Edhe këta fitojnë ndjesën e plotë – vijon Dokumenti – në se në këtë ditë
do t’u shërbejnë për ndonjë orë të sëmurëve, si ta bënin këtë për vetë Jezusin, me
shpirtin larg çdo lloj mëkati e me premtimin për të plotësuar sa më shpejt që të jetë
e mundur kushtet e kërkuara për të fituar ndjesën e plotë Në të njëjtën mënyrë
mund ta fitojnë këtë ndjesë edhe të sëmurët, në pamundësi për të marrë pjesë në kremtimet
e 11 shkurtit, me kusht që të marrin pjesë shpirtërisht së bashku me Papën në lutjen
për të sëmurët, duke ofruar vuajtjet e tyre. Së fundi, Dekreti i Benediktit XVI u
jep ndjesë të pjesëshme, nga 9 deri më 11 shkurti i ardhshëm, të gjithë besimtarëve,
sa herë që me zemër të penduar, do t’i drejtojnë Zotit të mëshirshëm lutje të devoçme
për t’ua lehtësuar vuajtjet të sëmurëve.